تقول صاحبة الرسالة…
تقول صاحبة الرسالة
أنا ست عندي 52 سنة من أسره متوسطة عليا ولما اتجوزت جوزي كمان وفر لي حياة مرفهة جدا.
خلفت ولدين آدم وآيزاك وعشت الحياة اللي بتشوفوها في التليفزيون بتاعة ستات البيوت المتدلعة اللي بتكون مهتمة بترتيب الحفلات والشوبينج والخروجات.
بس للأمانة جوزي كان شايف فيا اللي أكتر من كده عشان كده إداني فلوس وقاللي اشتري أسهم في البورصة.
بسرعة مش قادرة أصدقها كنت بحقق أرباح صحيح كان معايا وكيل بيديني نصايح بس كأني لقيت شغفي في الحياة بجانب إني زوجة وأم كونت ثروة مش قليلة إطلاقا من رؤيتي للأسهم وحركتها وخبرتي اللي اكتسبتها بسهولة شديدة.
ومرت السنين بشكل هادي أولادنا دخلوا الجامعات اللي حبوها آدم بقى دكتور وقدر في وقت قليل يشتري بيت خاص بيه و يتجوز سوزن ويبدأوا حياتهم!
لأسباب مجهولة جدا سوزن كانت بتتجنبني كأني جربانة! كل ما اعمل تجمع عائلي تعتذر كل ما اعمل حفلة ما تجيش!
وزاد الوضع لما خلفت! خلفت أولى أحفادي إيڤ وبعدها إيلين وفي المرتين كانت بترفض إني أساعدها في أي حاجة! حتى حفلة استقبال الأطفال رفضت إني أنظمها لها في بيتي!
تمام براحتها!
الأعياد والمناسبات بتفضل تقضيها عند أمها! ومهما حاولت أتحايل عليها تقضي أي عيد عندي تقوللي لأ يا حماتشي أصل ماما ما بتحسش بالعيد غير وأنا عندها!
حارماني من أحفادي حرفيا ماليش أي علاقة بيهم! لدرجة إنها لما جت تنزل الشغل هي كمان دكتورة عرضت عليها كل مرة إنها تعدي عليا البيبيز آخد بالي منهم لغاية ما ترجع بيت آدم قريب مني لكنها كل مرة كانت بتفضل تروح بعيالها ل فيصل عند أمها ولا تسيب لي العيال أشبع منهم!
عمري ما بخلت عليها ولا عمري طلبت منها حاجة مبالغ فيها! ما طلبتش منها تقوللي يا ماما ولما حاولت أشركها معايا في اللي بعمله وقلت لها عايزاها تساعدني في تنظيم حفلة جريت على آدم وقعدت تسح وتنح وتقول له إني بشيلها فوق طاقتها وإني بتعامل معاها على إنها خدامة وإنها بنت ناس ومش هتروح تساعد حد في بيته
